Prova e parë në skenën e “Eurovision”, zbulohet veshja dhe detaje nga performanca e Jonida Maliqit

Jemi vetëm nëntë ditë larg perfomancës së shumëpritur të Jonida Maliqit në skenën e “Eurovision”. Ditën e djeshme, artistja së bashku me delegacionin shqiptar u nisën drejt “Tel Aviv” në Israel. Ndërsa ditën e sotme Jonida ka bërë provën e parë dhe ka shkëlqyer, sërish!

Faqja zyrtare e “Eurovision” si dhe deligacioni i pranishëm kanë shpërndarë në rrjetet sociale disa video dhe foto gjatë provave duke na zbuluar kështu për herë të parë veshjen e këngëtares dhe detajet e perfomancës.

Jonida shfaqet më e bukur se kurrë me një fustan të gjatë me motive folklorike të modernizuara. Fustani i zi me pjesë tyli, është i ndërthurur me filigranë arë dhe gjysmë mëngë mbi supe.

Ndërkohë që detajet e veçanta nuk mungojnë as në skenografi. Gjatë këndimit të strofave të këngës, dritat që dominojnë janë ato bardh dhe blu, ndërkohë që në momentin kulminant të rrefrenit, skena kthehet kuq e zi.

Për perfomancën e saj, ashtu siç i ka hije, Jonida ka zgjedhur të këndojë mbi një kub të zi i cili krijon një imazh të bukur “piedistali”. Edhe këtë herë Jonida tërhoqi vëmendjen e të gjithëve me vokalin e saj.

Duke parë që deri tani çdo gjë po shkon më së miri, jemi të sigurtë që Jonida do shkëlqejë dhe presim rezultatin e merituar!

/News31/