Para një muaji aktori i famshëm i filmit “Gladiatori”, Russell Crowe, njoftoi se në 7 prill do të nxirrte në ankand rreth 200 sende personale për të paguar divorcin nga ish-bashkëshortja.
Dhe ja, 7 prilli erdhi… është ditëlindja e tij e 53 dhe do të kish qenë edhe përvjetori i 15 i martesës së tij, por aktori nuk ka në plan të bëjë asnjë festë, përkundrazi, ka çelur ankandin e tij të titulluar “Arti i Divorcit”, i cilësuar si një lloj larje hesapesh me të shkuarën, në Sidnei.
Ai u nda nga këngëtarja Danielle Spencer në 2012. Në ankand do të dalë armatura nga “Gladiatori”, kujtime nga “Master and Commander”, kitara, por edhe çizmet e tij neonaziste nga “Romper Stomper”. Ankandi i të shtunës pritet të mbledhë deri në 2.3 milionë dollarë. Aktori australian thotë se shitja ka të bëjë vetëm me ecjen përpara dhe lënien pas të një momenti të vështirë.
Veç të tjerash në ankand do të dalin edhe një numër pikturash të rëndësishme nga disa prej artistëve më domethënës në historinë e Australisë, por edhe nga ata modernë.
Për ata me një buxhet të kufizuar, po ashtu ka zgjedhje…ndoshta një shall dhe një palë këpucë të vjetra nga “State of play” apo një nga shumë kitarat e koleksionuara prej tij.
