Prej kohësh është folur për raportin e ngrirë mes Berishës dhe Fevziut që daton nga viti 2013, ku ky i fundit pati deklaruar se ish-Kryeministri e ka ftesën e hapur për të ardhur në studion e emisionit, por ka qenë vetë Berisha ai që ka refuzuar.
Në një intervistë të vitit 2015, Blendi Fevziu është shprehur: “Unë kam pasur një raport miqësor me zotin Berisha. Në këto 25 vite gazetari kam krijuar marrëdhënie me pothuajse gjithë njerëzit e rëndësishëm në vend, por Berisha dhe pak të tjerë kanë qenë miq. Ky raport është prishur për arsye të emisionit dhe qëndrimit të tij. Nuk e kam prishur unë, por zoti Berisha dhe, përderisa ai nuk mi ka bërë asnjëherë arsyet e tij prezente, unë nuk mund të flas për to. Nëse do ta pyesnit dhe do fliste, mund të më shërbente edhe mua për të kuptuar më shumë”.
Siç duket tashmë ajo kohë është e largët dhe të dy kanë vendosur paqen mes tyre. Këtë të paktën kuptojmë tek fotografia e publikuar nga këshilltarja për media e Berishës, Erla Mëhilli, ku të dy janë duke shtrëguar duart në zyrën e Berishës.
Tani na ngelet të presim nëse Berisha do të jetë i ftuar në studion e “Opinion”.
