Lewis Hamilton është shpallur kampion bote i “Formula 1” për herë të 7-të, duke barazuar kështu rekordin që mbahej nga Michael Schumacher.
Piloti britanik i “Mercedes” fitoi Çmimin e Madh të Turqisë, që u zhvillua në kushte të vështira për shkak të gjendjes së pistës. Megjithatë ai tregoi edhe një herë tjetër mjeshtërinë e tij në kushte të vështira atmosferike dhe në menaxhimin e gomave, pasi zhvilloi 52 xhiro me të njëjtat goma dhe ja doli të triumfojë.
Hamilton mori 25 pikët e plota të garës, ndërkohë që shoku i tij i skuadrës, Valtteri Bottas, i cili po e mbante gjallë matematikisht kampionatin, nuk hyri në zonën e pikëve. Në vend të dytë përfundoi Sergio Perez me “Racing Point”, ndërkohë që “Ferrari” zhvilloi një garë të mirë, duke u rikthyer në podium. Sebastian Vettel përfundoi garën në vendin e tretë pasi u nis nga vendi i 11, ndërsa Charles Leclerc menjëherë pas tij.
