Pavarësisht zhgënjimit, ky Eurovision do të mbahet mend gjatë në memorien tonë, pasi për herë të parë ishin tre shqiptarë konkurrent në një kompeticion europian.
Shqipëria u përfaqësua denjësisht me këngëtarin Eugent Bushpepa, dhe pse kënga e tij “Mall” u rendit e 11-ta me 184 vota. Megjithatë, Eugenti fitoi zemrat e të gjithë publikut nga vende të ndryshme të botës, duke i mahnitur me zërin e tij brilant.
Pas kthimit në Shqipëri, ai ka realizuar një intervistë për “Opionion” ku është pyetur nga Blendi Fevziu për rrugëtimin e tij në këtë eksperiencë magjike.
Veç të tjerash Eugenti rrëfeu edhe për takimin me Eleni Fourierën dhe Ermal Metën. Ai u shpreh se raportet mes tyre ishin shumë të mira dhe tregoi për herë të parë se pati një incident pasi publikoi foton me këngëtaren teksa bënin simboli e shqiponjës.
Qipro kishte kërkuar heqjen e fotografisë sepse sipas tyre dëmtohej performanca dhe përfaqësimi i tyre. Por Eleni Fouriera e kishte ndaluar diçka të tillë, duke u ndjerë e lumtur dhe krenare për prejardhjen e saj.
“Ne patëm një ftesë të takonim Elenin, unë nuk e kisha takuar asnjëherë më parë. Ajo ka shkuar që e vogël dhe është rritur në Greqi. Eleni ishte shumë e lumtur për prejardhjen e saj saqë në një fotografi që realizuam bashkë bëmë simbolin e shqiponjës. Ajo fotografi i hapi avaze. Ajo nuk u shqetësua aspak. Në fakt unë i kërkova falje që e publikova dhe ajo tha madje shumë mirë ke bërë që e kë lënë, sepse ata të Qipros tentuan që të hiqnin fillimisht fotografinë. Ata donin ta hiqnin sepse nuk donin që performanaca të merrte një konotacion negativ. Por ajo kërkoi që të mos hiqet fotografia sepse tha që jam e lumtur për prejardhjen time”,- u shpreh Bushpepa.
