Shqipëria nuk duhet të ndërmarrë veprime emocionale në raport me Kosovën.
Presidenti Ilir Meta ishte i qartë në mesazhin e tij për homologun kosovar Hashim Thaci, i cili kërkoi që qytetarëve të Kosovës t’u lejohet aplikimi për shtetësi shqiptare me qëllim lëvizjen e lirë. Por, për këtë, Presidenti Meta theksoi se edhe vetë Shqipëria është nën monitorim të vendeve të BE-së dhe zonës Shengen.
“Besoj se dhe ju ndjeni atë presion që ne ndjejmë ne këtu, me dëshirën për ta tejkaluar këtë pengesë apo izolim, përmes marrjes së shtetësisë shqiptare nga qytetarët e Kosovës, gjë që nuk është zgjidhje, Jo për shkak të mungesës tonë të dëshirës por për faktin se ne vetë jemi në monitorim për çështjen e liberalizimit të vizave nga vendet e BE-së dhe të zonës Shengen”, tha Meta.
Sipas kreut të shtetit, ky veprim do të rrezikonte edhe vetë lëvizjen e qytetarëve shqiptarë.
“Çdo veprim emocional nuk do të zgjidhte problemin e lëvizjes së lirë të shqiptarëve të Kosovës por do të bllokonte lëvizjen e lirë të qytetarëve të Shqipërisë. Ndërsa në një plan më afatgjatë kjo nuk do të thoshte asgjë për marrëdhëniet e Kosovës me BE-në, përkundrazi do i vinte ato në një pozitë edhe më të vështirë”, vijoi presidenti.
Presidenti Meta inkurajoi klasën politikë në Kosovë, për të bërë gjithcka duhet për të cuar përpara edhe dialogun me Serbinë.
“Shpresoj që pas raundit të dytë të zgjedhjeve që po bëhen atje edhe politika e Kosovës të bëjë përpjekje më të mëdha për të kapërcyer këtë moment sepse zgjidhja e këtij problemi do ta përqëndronte akoma më mirë Kosovën në problemet më të mëdha që ajo ka për ta çuar përpara dialogun me Serbinë por mbi të gjitha do t’i jepte fund një frustrimi të jashtëzakonshëm që me të drejtë e kanë qytetarët e Kosovës, si të vetmit në rajon që po përjetojnë një izolim të padrejtë e të pamerituar”, tha më tej ai.
Në takimin me ambasadorët e Shqëipërisë, Presidenti Ilir Meta theksoi se Shqipëria duhet të vazhdojë përpjekjet për të përmbushur 5 prioritetet për celjen e negociatave me BE-në.
