Shtetet e Bashkuara të Amerikës goditën me raketa bazën ajrore të Sirisë, nga ku besohet të jenë ngritur avionët përgjegjës për sulmin kimik të së martës në provincën e Idlibit.
59 raketa “Tomahawk” janë lëshuar në 04:40 me orën lokale nga një destrojer i vendosur në lindje të Mesdheut. Në një fjalim të shkurtër përpara mediave në Florida, Presidenti amerikan Donald Trump i bëri thirrje të gjithë kombeve të civilizuara t’i bashkohen Amerikës, për t’i dhënë fund masakrave dhe gjakderdhjes në Siri e për të goditur gjithashtu terrorizmin e çfarëdo lloji.
“Të martën, Bashar al Assad ndërmori një sulm të tmerrshëm kimik kundër civilëve të pafajshëm, duke përdorur një agjent nervor vdekjeprurës. Assadi mbyti jetët e burrave, grave dhe fëmijëve të pambrojtur. Për shumë prej tyre ishte një vdekje e ngadaltë dhe brutale. Asnjë fëmijë i Zotit nuk duhet të vuajë një llahtar të tillë. Unë urdhërova një sulm ushtarak ndaj bazës ku u organizua kjo goditje. Ky ishte një veprim në mbrojtje të interesave jetike të sigurisë kombëtare të Shteteve të Bashkuara për të parandaluar përhapjen dhe përdorimin e mëtejshëm të armëve kimike vdekjeprurëse. Nuk ka asnjë diskutim që Siria përdori armë të ndaluara të këtij lloji, duke shkelur kështu detyrimet e saj që burojnë prej Konventës së Armëve Kimike e duke injoruar Këshillin e Sigurimit të OKB-së”, tha Trump.
Por, ministri i Jashtëm sirian, Walid al-Moallem, e mohon përdorimin e armëve kimike: “E theksoj edhe një herë se ushtria jonë siriano-arabe nuk ka përdorur dhe nuk do të përdorë asnjëherë armë kimike ndaj popullit të thjeshtë, e nuk ka për t’i përdorur as mbi terroristët”.
Burime konfidenciale thanë për “The Guardian” se zyrtarët amerikanë të inteligjencës besojnë se kishte personel rus në bazën e al-Shayratit në momentin kur gazi sarin u ngarkua në një avion sirian, por ende nuk e kanë përcaktuar qartë nëse rusët ishin në dijeni të asaj që do të ndodhte. Pentagoni sqaroi se ushtria ruse, e cila mbështet qeverinë siriane, ishte njoftuar që më parë për sulmin me raketa, kërkon, sipas tij, ta frenojë regjimin e Asadit nga përdorimi i armëve kimike në të ardhmen. Nuk ka detaje të sakta për viktima, por guvernatori i provincës së Homsit flet për disa të vdekur e thotë se disa pjesë të bazës janë përfshirë nga zjarri. Për momentin, nuk dihet ende nëse ky ishte vetëm një akt hakmarrjeje apo një hap që shënon fillimin e një fushate më të gjatë kundër Asadit.
