A mundej të superohej melankolia perfekte e “Lay Me Down” të Sam Smith? Mendonim se jo, e megjithatë n’a u desh t’a rimendonim përgjigjen pasi dëgjuam versionin e singëllit ku artisti dueton me të jashtëzakonshmin John Legend. Lajmërimi për këtë bashkëpunim erdhi nëpërmjet Instagramit dhe ishte vërtetë një surprizë tejet e bukur. Dy artistët vendosën t’a regjistronin singëllin e ri (i cili është pjesë e albumit “In the Lonely Hour” të Sam Smith) për Comic Relief, një organizatë humanitare angleze të cilës do t’i shkojnë të ardhurat nga shitja e singëllit.
Por nuk është e gjitha: Sam do t’a interpretojë këtë këngë në Red Nose Day (Dita e Hundës së Kuqe), një event i organizuar pikërisht nga kjo organizatë. “Së fundmi kam parë një projekt të Comic Relief në qytetin tim të lindjes Londrës, që ndihmonte të rinjtë e komunitetit LGBT. Jam ekstremisht krenar që singëlli im do të ndihmojë të mblidhen fonde për projekte si këto në Mbretërinë e Bashkuar dhe Afrikë”,- ka deklaruar Sam Smith. Ndërkohë John Legend ka deklaruar: “Sam është një artist plot talent. Me zorr pres të bashkëpunoj me të dhe jam shumë i lumtur që kemi punuar së bashku për një këngë kaq të bukur dhe për një çështje të drejtë”.
Dhe tani të gjithë mbani qetësi sepse do dëgjoni “Lay Me Down”.
