Filmi i fundit i Tom Cruise, “Mumja”, nuk e bind kritikën.
“Ka disa momente të këndshme, – thotë Peter Bradshaw i “The Guardian”, – por përgjithësisht është një rrëmujë e vërtetë”.
“Komplote që zgjaten si gjymtyrë në kalbëzim, një lëmsh idesh dhe skenash që duket sikur vijnë nga copëza skenaresh të ndryshme”.
Gazeta prestigjioze e lë komentin me kaq, që publiku ta kuptojë vet. “The Empire” ishte pak më e butë. “Vrapimi dhe hedhjet e forta janë të preferuarat e Cruise”, shkruan revista britanike.
“Ai është prapë në territorin e vet të parapëlqyer, edhe si protagonist që afrohet me një vajzë shumë më të re sesa ai, ndërkohë që nga pas i është vënë një grua tjetër”.
“The Independent” mendon se skenat aksion ia vlejnë të shihen, por kur ato mbarojnë, filmi duket i zbrazët. “Hiq fashat e mumjes, – shkruan Geoffrey Macnab për këtë gazetë, – dhe nuk mbetet shumë për të parë”.
Përpara se Cruise të vihej në rolin e njeriut që shpëton civilizimin modern nga kërcënimet e lashta egjiptiane, adhuruesit e filmit ishin mësuar ta lidhnin emrin e mumjes me triologjinë e nisur nga aktori Brendan Fraser, e cila u bë menjëherë e dashur për publikun.
“New York Times” ka një këshillë për filmin e ri të Tom Cruise, që risjell një tematikë të vjetër: varroseni shpejt!
