Dua Lipa ka ndarë detaje nga historia e dashurisë me bashkëshortin e saj, aktorin britanik Callum Turner, duke treguar se letërsia ka luajtur një rol të veçantë në afrimin e tyre. Gjatë një interviste para Festivalit të Letërsisë në Londër 2026, këngëtarja foli për interesin e përbashkët për librat, jetën martesore dhe mënyrën se si kjo marrëdhënie mund të ndikojë në krijimtarinë e saj muzikore.
Një nga librat që i afroi ishte romani Trust, i shkrimtarit Hernán Díaz. Sipas rrëfimit të saj, zbulimi se po lexonin të njëjtën pjesë të librit u shoqërua me një koment romantik nga Turner, për të treguar se jo vetëm po lexojnë të njëjtën pjesë, por edhe se ata kuptohen dhe ndajnë të njëjtin mendim.
“Pra, jemi në të njëjtën faqe”, i kishte thënë ai.
Pasioni i Dua Lipës për letërsinë është i njohur edhe përmes klubit të saj të leximit, Service95, ku ajo promovon vepra dhe zhvillon biseda me autorë të ndryshëm.
“Ne e kuptojmë dhe e mbështesim njëri-tjetrin”
Duke folur për marrëdhënien me Turner, këngëtarja theksoi se një nga elementet më të rëndësishme për të është aftësia për të ruajtur ekuilibrin mes karrierës, familjes dhe pasioneve personale.
“Jam shumë e mirë në gjetjen e ekuilibrit mes punës, pasioneve dhe familjes”, u shpreh ajo.
Dua tregoi se martesa nuk e ka bërë të heqë dorë nga ambiciet profesionale. Përkundrazi, ajo e konsideron veten me fat që ka në krah një partner që e kupton përkushtimin e saj ndaj punës.
“Nuk i kam lënë kurrë mënjanë ambiciet e mia dhe jam me fat që jam me dikë që e do punën po aq sa unë. Ne e kuptojmë dhe e mbështesim njëri-tjetrin”, tha këngëtarja.
Ajo e përshkroi lidhjen me aktorin si një marrëdhënie të ndërtuar mbi mirëkuptimin dhe afërsinë e veçantë mes tyre.
“Për mua, ai është familja ime. Gjuha jonë krijuese është unike. Kur marrim vendime së bashku, është sikur kemi të njëjtin tru. Ndjekim të njëjtat instinkte”, rrëfeu Dua.
Nga këngët për ndarjet te muzika për dashurinë e vërtetë
Lumturia që po përjeton në jetën personale mund të ndikojë edhe në drejtimin e ardhshëm të muzikës së Dua Lipës.
Këngëtarja ka gjetur më parë frymëzim në përvojat e dhimbshme sentimentale dhe në ndarjet, por tani dëshiron të eksplorojë edhe emocionet që vijnë nga një marrëdhënie e qëndrueshme.
“Është më e lehtë të shkruash këngë dashurie kur e ke zemrën të thyer, sepse dhimbja e ndarjes është një emocion shumë i fuqishëm dhe i zhurmshëm. Por tani dua të zbuloj se çfarë ndodh kur e gjen vërtet dashurinë”, shpjegoi ajo.
Ajo shtoi se dëshiron të përqendrohet edhe te anët më pak të dukshme të një marrëdhënieje, përfshirë momentet e qeta dhe gjestet e vogla të përditshme.
“Më interesojnë kompleksitetet e një marrëdhënieje, momentet e saj më të qeta dhe gjërat e vogla”, përfundoi këngëtarja.
Rrëfimet e Dua Lipës tregojnë se marrëdhënia me Callum Turner për të nuk lidhet vetëm me jetën personale, por edhe me mënyrën se si e sheh krijimtarinë.
