Gjykata e Apelit ka lënë të pandryshuar masën e sigurisë “arrest shtëpie” për kryetarin e Bashkisë së Kavajës, Elvis Rroshi, i akuzuar për falsifikim të formularit të vetëdeklarimit në kuadër të ligjit për dekriminalizmin.
Pranë Gjykatës së Apelit kishin bërë ankim si prokuroria, e cila kërkonte rikthimin në burg të Rroshit, ashtu edhe vetë i pandehuri, i cili kërkonte të mos kishte asnjë masë sigurise.
Përfaqësuesi i prokurorisë, duke kërkuar mbajtjen e Rroshit në paraburgim, e cilësoi atë me rrezikshmëri të lartë shoqërore, pasi dyshohet se ka kryer vepra të rënda penale jashtë vendit, të cilat nuk i ka deklaruar në formular dhe se mund të prishë provat. Ndërsa avokati mbrojtës i Rroshit, në mungesë të klientit të tij, i cilësoi argumentet e prokurorisë të pabazuara në fakte dhe prova dhe kërkoi që ndaj Elvis Rroshit të mos vendoste asnjë lloj mase sigurie.
