Tiranë – Rama, qeveria ushtron presion ndaj qeverisjes vendore

Duke folur për punën kolosale të Bashkisë në kryeqytet Rama, akuzoi qeverinë se po ushtron trysni të madhe ndaj punës të qeverisjes vendore, e cila nuk ka hapësirat e domosdoshme që i jep Kushtetuta. Kryebashkiaku deklaroi se transformimi që ka marrë Tirana është vetëm një pjesë e transformimit të vërtetë që do të pësojë Shqipëria pas zgjedhjeve të 28 qershorit. “Tirana do të duket ndryshe pas 28 qershorit, pasi e gjithë kjo punë kolosale realizohet në një trysni të jashtëzakonshme dhe një vështirësie të patregueshme për shkak të një qeverie injorante e cila nuk do, nuk di dhe nuk mund të bëjë më shumë për të bërë atë detyrë të domosdoshme që ky kryeqytet të funksionojë siç duhet dhe qeveria vendore e këtij të ketë hapësirën e domosdoshme që i jep Kushtetuta. Unë i siguroj të gjithë se ky transformim i madh i Tiranës është vetëm një pjesë e atij transformimi që do të shihet pas zgjedhjeve të 28 qershorit”- tha Rama. Rikonstruksioni në bllokun numër 51 në “Don Bosko” është një investim i Bashkisë së Tiranës dhe parashikon rehabilitimin e plotë të rrjetit të ujësjellësit, sistemimin e kanalizimeve, ndriçimin rrugorë në të dyja anët e rrugës si dhe sheshet e parkimit publik.