Tiranë – PS, rrëzimi i ankimit për Beratin është jo legjitim

Në deklaratën për mediat të zëdhënëses së PS, Armela Imeraj, theksohet se vendimi i shumicës së KQZ për të mos lejuar transparencën mbi procesin zgjedhor të Beratit, përbën një shprehje kuptimplotë jo vetëm të frikës që ka Sali Berisha nga zbardhja e krimit elektoral të 28 qershorit, po edhe të gjendjes kritike të demokracisë sonë pas 28 qershorit. “Ligji na e jep qartë dhe fare shkoqur të drejtën për të kërkuar transparencë të plotë në Komisionin Qendror të Zgjedhjeve dhe as katër ushtarë të verbër të Sali Berishës në KQZ, as përfaqësuesit ligjor të tij që vijimësisht kanë kërcënuar në sy të gjithë publikut zonjën Dëshira Subashi, as vetë Sali Berisha nuk mund të na e mohojnë këtë të drejtë me dhunë”, thuhet në deklaratë. Duke vazhduar më tej në deklaratë, me vendimin e KQZ për Beratin, PS e cilëson jo legjitim parlamentin e ri të Shqipërisë në NATO dhe në dyert e Bashkimit Europian, nëse nuk zbatohet Ligji Zgjedhor. “Partia Socialiste nuk mund të zmbrapset në detyrimin e saj për të mbrojtur liri e të drejta shqiptarësh që as na i ka dhënë e as na i merr dot Sali Berisha”, përfundon deklarata e selisë rozë.