Tiranë – Meta merr detyrën e Ministrit të Jashtëm

Në ceremoninë e dorëzimit të posteve, Basha ka falënderuar stafin e tij me të cilin bashkëpunoi jo pak vite. Por ai nuk ka kursyer fjalët e mira për pasuesin e tij. Basha e ka cilësuar Metën si një politikan me përvojë duke shprehur bindjen se me të, shërbimi i jashtëm do të plotësojë shumë mirë synimet dhe mandatin e politikës së jashtme të Qeverisë së Integrimit. Në fjalën e tij, zv/kryeministri dhe ministri i Jashtëm Ilir Meta shprehu kënaqësinë që takohet sërish me stafin e shërbimit të jashtëm. Meta theksoi se shërbimi i jashtëm do t’i realizojë me sukses objektivat e politikës së jashtme. Ai shprehu bindjen e tij se politika e jashtme do të vazhdojë në po ato linja shumë të qarta, për të cilat edhe ka marrë vlerësime maksimale nga komuniteti ndërkombëtar si faktor i rëndësishëm i paqes, mirëkuptimit dhe bashkëpunimit në rajon. “Para se të largohesha, 6 vjet më parë nga ky dikaster, unë në emër të Qeverisë shqiptare, nënshkrova Kartën e Adriatikut. Tani ne jemi vend anëtar i NATO-s dhe kjo është domethënëse dhe flet qartë për vazhdimësi dhe përkushtim ndaj integrimit evropian dhe euroatlantik”, tha Meta.