Tiranë – Lohan, duhet kujdes në regjistrimin e popullsisë

Kështu është shprehur kreu i delegacionit të Komisionit Evropian në Tiranë, Helmut Lohan, në një takim të posaçëm zhvilluar mes ekspertëve të insitucioneve përkatëse, të cilët do të përfshihen në procesin e ardhshëm të regjistrimit të popullsisë shqiptare. Më tej, ai tha se ekspertët gjatë regjistrimit të ri të popullsisë duhet të tregojnë mjaft kujdes edhe me identifikimin e pakicave kombëtare dhe minoriteteve kombëtare në vend, duke realizuar pyetësorë sa më korrektë rreth tyre, në mënyrë që të zbulohet në mënyrë sa më të saktë prania e vërtetë e tyre në territorin shqiptar. Pa harruar të shtojë se në këtë proces, mjaft e rëndësishme mbetet edhe ruajtja e privatësisë së të dhënave të personave. “Duhet menduar si një proces sa më i rëndësishëm dhe prandaj duhet që të jetë një proces sa më i saktë, në mënyrë që të sjellë rezultatet e dëshiruara”, konsideroi përfaqësuesi i lartë evropian. Duke shtuar se mjaft aktorë janë të përfshirë në këtë projekt, si një garanci për këtë proces dhe fushatën sensibilizuese që duhet të bëhet para realizimit të tij.