Në një prononcim për mediat pas mbledhjes, përfaqësuesi i PS-së, eksperti Bledar Çuçi tha se u miratuan ato nene të kodit zgjedhor për të cilat ka pasur dakortësi. “Sot kaluam me konsensus kapitullin e ankimit administrativ, kapitullin e ankimimit gjyqësor, si dhe nenet për të cilat është rënë dakord. Ndërsa, ende nuk është miratuar pjesa ankimore që lidhet me problemet më sensitive, që kanë të bëjnë me barazinë e palëve në procesin administativ”. Çuçi theksoi se nëse palët do të kenë vullnet komisioni mund ta përmbyllë reformën zgjedhore brenda afatit të caktuar nga parlamenti, më 12 Korrik. Eksperti i PS-së shtoi se bashkëkryetari socialist i komisionit, Damian Gjiknuri propozoi një seancë dëgjimore me partitë e vogla për ditën e hënë, për të paraqitur kërkesat e tyre për reformën zgjedhore, por ky propozim nuk u pranua nga bashkëkryetari demokrat, Ilir Rusmali. Ky i fundit i kërkoi ekspertëve që të eksplorojnë dhe njëherë mbi kërkesat e partive të vogla dhe t’i sjellin për diskutim në komision. Përfaqësuesi i opozitës, tha gjithashtu, se në rast se palët do të kenë vullnet, reforma zgjedhore, më e rëndësishmja reformë ligjore në vend, do të mund të përmbyllet brenda afatit të caktuar nga Kuvendi, më 12 korrik. Kryetari i Partisë Republikane, Fatmir Mediu tha se propozimet e partive të vogla për reformën zgjedhore do të merren në shqyrtim nga ekspertët e komisionit të posaçëm parlamentar. “Ne i kemi përcjellë propozimet konkrete pranë komisionit dhe sot morëm një përgjigje që ekspertët do të shqyrtojnë kërkesat tona dhe më pas do të shikohen procedurat më tej me partitë politike, që kanë sjellë propozimet. Shpresojmë të mos përjashtohet kurrkush nga diskutimi, aq më tepër forcat parlamentare dhe jo parlamentare, të cilat kanë të drejtë të kenë zërin e tyre për reformën”, theksoi kryetari republikan. Mediu nënvizoi se kërkesat e partive të vogla lidhen me përllogaritjen e mandateve, korrektimin e sistemit elektoral, vëzhgimin e zgjedhjeve etj.
