“Të gjitha ligjet kanë shkuar më datë 6 në qeveri dhe në datë 7 në parlament. Këto janë marrëveshje borxhi dhe po merrni 500 milionë dollarë hua duke shkelur ligjin”, u shpreh anëtari socialist në komision, Erjon Brace. Kreu i komisionit, Edmond Spaho theksoi se e gjithë puna është brënda procedurave. Në ligjin e buxhetit të shtetit, parlamenti ka autorizuar qeverinë që për gjithë vitin 2009, borxhi të jetë jo më shumë se 410 milionë dollarë për të qëndruar brënda deficitit prej 4.1%. “Vetëm sot po marrim 496 milionë dollarë hua dhe kjo shumë i tejkalon limitet”, u shpreh Brace. Ndërsa Spaho theksoi se kreditë janë të parashikuara në buxhet. Pika tjetër e nxehtë e debatit lidhej me interesat e kredive, sidomos asaj tregtare prej 250 milionë euro, që qeveria mori pak ditë më parë. “Po miratojmë këtu me votë një kredi, interesi i së cilës arrin në 15%. Qytetarët duhet ta dinë se bëhet fjalë për një borxh”, theksoi Brace. Menjëherë ka reaguar kryetari Spaho, i cili sqaroi se për shkak të përmbytjes së kapitaleve, situatës së krijuar, qeveria negocioi me një numër bankash dhe arriti të marrë kredi në një kohë shumë të vështirë.
