“Presidenti Barack Obama ka emëruar diplomatin Donald Lu si ambasador të ardhshëm të SHBA-së në Shqipëri”, bën të ditur Zëri i Amerikës. Përmes një deklarate për shtyp, Presidenti Obama shprehet për kandidaturën e zotit Lu si dhe kandidaturat e tjera për poste të rëndësishme administrative të njoftuara të enjten, se “këta individë kanë treguar njohuri dhe përkushtim gjatë gjithë karrierës së tyre. Ndjehem mirënjohës që kanë pranuar të marrin mbi vete role të rëndësishme dhe mirëpres punën me ta në muajt dhe vitet në vijim”. Z. Donald Lu, i cili zëvendëson në këtë detyrë z. Aleksandër Arvizu, është një diplomat karriere dhe aktualisht është Zv/Shef i Misionit Diplomatik amerikan në Nju Delhi të Indisë. Më parë ai ka shërbyer në ambasadën amerikane në Baku të Azerbajxhanit si i Ngarkuar me Punë nga viti 2009-2010 dhe si Zëvendës Shef i Misionit nga 2007-2009. Nga viti 2003-2006, z. Lu ka qenë Zv/Shef i Misionit Diplomatik amerikan në Bishkek të Kirgistanit. Donald Lu ka shërbyer si Zëvendës Drejtor i Zyrës për Azinë Qendrore dhe Çështjet e Kaukazeve të Jugut nga viti 2001-2003 dhe si Asistent i Posaçëm i Ambasadorit për Vendet e Sapo-Shpallura të Pavarura nga viti 2000-2001. Ndër funksione të tjera diplomatike përfshihet: Asistent i Posaçëm i Ambasadorit në Misionin Diplomatik amerikan në Nju Delhi; Zyrtar i Konsullatës amerikane në Tbilisi të Gjeorgjisë; Zyrtar Politik në Konsullatën amerikane në Peshavar të Pakistanit. Z. Lu ka qenë në Sierra Leone nga 1988-1990 si vullnetar me Korpusin e Paqes. Ai ka diplomën e studimeve universitare dhe pasuniversitare nga Universiteti i Princetonit.
