Tiranë – Berisha takohet me Micallef, diskutohet edhe situata paszgjedhore

Gjatë takimit, Berisha shprehu vendosmërinë e qeverisë shqiptare për të forcuar autonominë e qeverisjes lokale, për t’i përkrahur ato financiarisht dhe me të gjitha mjetet, në mënyrë që të përmbushin misionin e tyre. Kryeministri i bëri me dije Micallef se gjatë mandatit qeverisës 2005-2009 granti për pushtetin lokal nga buxheti i shtetit u rrit tre herë. “Jam shumë i lumtur që ndodhem këtu, dhe të konstatoj një zhvillim të jashtëzakonshëm që është bërë në forcimin e autonomisë së pushtetit lokal dhe në përmbushjen nga ana e qeverisë e kritereve të Kartës Evropiane për Vet-qeverisjen Vendore. Kam konstatuar me kënaqësi zhvillime të jashtëzakonshme pozitive” tha Micallef. Presidenti Micallef i shprehu kryeministrit Berisha mbështetjen e plotë dhe vendosmërinë e Kongresit të Autoriteteve Lokale dhe Rajonale të ndihmojë qeverinë shqiptare në përpjekjet e saj për forcimin e decentralizimit dhe përmbushjes së kritereve të Kartës së Qeverisjes Lokale dhe Rajonale të KE-së. Në takim, u diskutua edhe situata paszgjedhore. Berisha i bëri me dije Presidentit Micallef për masat e marra nga qeveria shqiptare dhe rezultatet e arritura, të cilat bënë të mundur që për herë të parë Shqipëria të vlerësohet nga ëatchdog-u OSBE/ODIHR si vendi që plotësoi standardet kryesore te saj për zgjedhjet. Presidenti Micallef, duke ndarë të njëjtin mendim me Kryeministrin Berisha për të gjitha zhvillimet pozitive në Shqipëri, theksoi se e shikojmë me shqetësim dhe skepticizëm një përpjekje nga ana e opozitës për të krijuar mosbesim në klimën politike, e cila nuk i përputhet dhe as i shërben realitetit që ekziston sot në Shqipëri, për sa i përket standardeve Evropiane.