Këtë fakt e ka konfirmuar edhe një studim i qendrës “Gratë dhe cilësia e jetës” që ka monitoruar 4 mijë shtëpiake në të githë Europën, midis të cilave 700 italiane. Arratia është ëndrra në sirtar e shtëpiakeve italiane. Arrati në Maldive, Hawaii, Mauritius, mbase dhe të ndihmuara nga fitimi i ndonjë llotarie… E nëse do të mundnin t’a kthenin kohën pas, nuk do të ishin martuar. 76 shtëpiake në 100 janë të dëshpëruara për shkak të krizës ekonomike. Shkalla e pakënaqësisë së tyre është 76%, rreth 2,5% më e lartë se vitin e shkuar.
Italianet qëndrojnë kështu në krye të klasifikimit të pakënaqësisë, ndjekur nga spanjollet (63%), francezet (57%), anglezet (51%) dhe gjermanet (47%). Ja dhe shkaqet e dëshpërimit të grave: në vendin e parë është kriza ekonomike dhe ulja e mundësisë për të blerë (për 46% të të intervistuarave), jeta e shtrenjtë (27%), mungesa e mbështetjes nga familja (24%), shtrenjtësia e kopshteve (23%), mbështetja e dobët shëndetësore (21%), burri pak i vëmendshëm dhe aspak ndihmë në shtëpi (18%), mungesa e dialogut me partnerin (17%), puna jo e sigurt (11%). Gjysma e shtëpiakeve të dëshpëruara italiane do të donin dhe të iknin nga Italia: mes destinacioneve të preferuara renditen Maldivet, Hawaii apo Mauritius (për 38% të të intervistuarave), por edhe vendet e Europës Veriore ku roli i gruas është më i mbrojtur si Danimarka (14%), Suedia (9%) apo Norvegjia (8%). Përmenden edhe Spanja (6%) dhe Greqia (3%) pasi kostoja e jetës është më e ulët.
Në fakt nuk është vetëm kriza ekonomike që ndikon në humorin e shtëpiakeve. Edhe punët e familjes peshojnë shumë në pjatën e peshores së pakënaqësisë. Një shtëpiake në dy nëse do të mund të ktheheshin prapa në kohë nuk do të martoheshin dhe dy në tre nuk do të bënin fëmijë.
