Velipoja një prej zonave më të njohura turistike në vend, këto katër vjet ka njohur ndryshimet të jashtëzakonshme në infrastrukturë, rrugë, ujësjellës, kanalizime në sistemin arsimor e shëndetësi. Mbi 12 milionë euro nga buxheti i shtetit janë investuar në rikonstruksion rrugësh si ajo nacionale Mali Kolaj-Vilu, 400 milionë lekë, rindërtim i shëtitoreve, ku vetëm në shëtitoren e plazhit janë derdhur 20 milionë lekë, akse të tjera rurale, ndërtimin e shkollave Gjergj Vat Martini, Rec i Vjetër dhe Mal Kolaj me vlerë mbi 43 milionë lekë, ndërtimi i pesë qendrave shëndetësore, sigurimi i energjisë 24 orë, dhe investime të tjera në sektorët publikë. Pasi përuroi shkollën e re një investim prej 32 milionë lekë Kryetarja e Kuvendit tha se investimet e kryera në Shqipëri këto katër vjet, janë shifra të paimagjinueshme. “Vij këtu në Velipojë, tha Kryetarja e Kuvendit dhe shoh që është ndërtuar rrugë e re, urë e re, shkollë e re, ujësjellës i ri, rrugë të tjera të reja. Kjo është Shqipëria që po ndryshon”, – theksoi Topalli. “Të gjitha veprat e përfunduara në total shkojnë 12 milionë euro. Unë këtu kam zyrtarë që kanë drejtuar vite më parë bashkinë e Shkodrës. Në 8 vjet rresht në bashkinë e Shkodrës nuk kanë ardhur më shumë se 1 milion dollarë, kurse vetëm në Velipojë, sikurse edhe dje në komunën e Shëngjinit dhe ashtu si në çdo komunë tjetër të Shqipërisë, në veri apo në jug, apo në lindje dhe perëndim, ka nga 10 herë, 15 herë më shumë investime” u shpreh Topalli. “Pas 28 qershorit në mandatin e dytë, kemi të tjera projekte të mëdha, zhvillimin ekonomik e kemi përpara. Projektet tona janë vazhdimi i atyre projekteve të zhvillimit ekonomik që kanë bërë që kjo Shqipëri të shihet dhe të renditet nga vëndet e tjera ndryshe nga sa renditej vetëm 4 vite më përpara” shtoi më tej kryeparlamentarja. “Më 28 qershor do të jetë ditë e bukur, e madhe, më 28 qershor ne do të realizojmë fitoren më të fortë dhe më të thellë, nga seç e kemi pasur 4 vite më përpara, sepse shqiptarët duan të vazhdojnë në rrugën e integrimit, të pritjes, të marrjes së investimeve më të mëdha” u shpreh Jozefina Topalli. Kurse shtoi se kemi kapur “rekord në rritjen ekonomike, të rrogave, në pensione, në shpejtësinë e integrimit”. Po ashtu, shtoi se “kemi qenë rekord në secilën garë ku Shqipëria ka marrë pjesë dhe ju na keni mbështetur”.
