Kryeministri Edi Rama ka zyrtarizuar sot emrin e Erjon Veliajt si kandiatin e mazhorancës për bashkinë e Tiranës në zgjedhjet e 21 qershorit.
Kryeministri Rama u shpreh pas takimit me partitë e koalicionit dhe deputetët e PS për qarkun e Tiranës se, “është finalizuar emri i kandiatit për Tiranën, do të jetë Erjon Veliaj”.
Erjon Veliaj mban postin e ministrit të Mirëqënies Sociale dhe Rinisë që prej shtatorit të vitit 2013.
Erion Veliaj lindi në Tiranë, më 17 Dhjetor 1979.
Studimet Bachelor i ka kryer për Shkenca Politike në Grand Valley State University në Miçigan të Shteteve të Bashkuara të Amerikës. Më pas ai përfundoi studimet Master në Mbretërinë e Bashkuar pranë University of Sussex, me fokus tek Integrimi Europian.
Ai hyri në politikë pas një angazhimi të gjatë në shoqërinë civile, organizata ndërkombëtare dhe media. Në vitin 2003, z. Veliaj themeloi lëvizjen “MJAFT”, një organizatë që unifikoi frymën aktiviste e protestuese të rinisë shqiptare e që në vitin 2004 mori dhe çmimin e Kombeve të Bashkuara për shoqërinë civile. Z. Erion Veliaj drejtoi lëvizjen “MJAFT” deri në nëntor të vitit 2007. Më pas Veliaj iu bashkua Iniciativës për Stabilitetin Evropian, një organizëm kyç në promovimin e zgjerimit të BE-së.
Në vitin 2011, z. Veliaj iu bashkua kryesisë së Partisë Socialiste së Shqipërisë si Sekretar për Rininë dhe Emigracionin. Në zgjedhjet parlamentare të vitit 2013 ai u zgjodh deputet i Qarkut Gjirokastër.
Z.Veliaj flet shumë mirë gjuhët angleze dhe italiane, si dhe njeh mirë gjuhën gjermane dhe atë frënge.
