Maqedoni – Adili akuzon Gruevskin për përcarjen e shqiptarëve

Adili e ka deklaruar këtë në një opinion të tij të botuar nga mediat shqiptare, ku siç thuhet Gruevski i ka ndarë nga buxheti mbi 20 milion euro Drejtorisë së Sigurimit Shtetëror (DBK) për shpërbërjen e subjekteve kryesore shqiptare BDI dhe PDSH. “Rruga e parë, është rruga që të vazhdojë të mbetet në qeveri me Nikolla Gruevskin dhe t’i shpërbëhet BDI, për shpërbërjen e së cilës, pra BDI-së, Sasha Mikajlov, shefi aktual i Drejtorisë së Sigurimit Shtetëror të Maqedonisë (DBK), djali i dajës së Nikolla Gruevskit, vitin e kaluar ka marrë mbi 20 milionë euro nga Gruevski për diversion ndaj shqiptarëve dhe partive të tyre”, ka theksuar Adili. Sipas tij, rreth 5 milionë euro, DBK i ka përdorur për diversion kundër PDSH përmes Demokracisë së Re të Imer Selmanit, dhe rreth 5 milonë gjatë zgjedhjeve të fundit për president të “Maqedonisë”. Zëdhënësi i FBKSH-së, Gafurr Adili, me origjinë nga Kërçova ditëve të fundit ka shtuar vëmendjen për zhvillimet e brendshme në Maqedoni, duke riaktualizuar ngjarjen e Brodecit.