Çdo bloger apo influencer që siguron të ardhura përmes përdorimit të rrjeteve sociale konsiderohet subjekt tregtar dhe është i detyruar të publikojë në llogarinë e tij/ saj të dhënat bazë, përfshirë NIPT-in, emrin e subjektit, adresën dhe kontaktin.
Sipas një ndryshimi të bërë në ligjin “Për Procedurat Tatimore në Republikën e Shqipërisë” veprimtaria ekonomiko-tregtare përfshin edhe veprimtarinë e ushtruar përmes internetit.
Nëse të dhënat e lartpërmendura nuk publikohen prej personave përkatës, administrata dërgon një njoftim zyrtar ndaj publikimit të tyre.
Koha e përcaktuar për ndjekjen e udhëzimeve është 15 ditë dhe nëse ky afat shkelet, administrata tatimore i kërkon Autoritetit të Komunikimeve Elektronike dhe Postave (AKEP), bllokimin e përkohshëm të llogarisë përmes së cilës ushtrohet aktiviteti.
Pak muaj më parë qeveria monitoroi llogaritë e rreth 100 influencërve e mediave online. Dyshohej se prej tyre nuk ishin paguar detyrime prej 33 milion eurosh të përfituara nëpërmjet platformave të Facebook, Instagram, YouTube, Google, TikTok e PayPal.
