Referendumi i miratuar në kongres për legjitimitetin e mandatit të kryetarit të PS është rikthyer si temë diskutimesh në mbledhjen e përjavëshme të grupit paralamentar socialist.
Deputeti Ben Blushi ka kërkuar të dijë teknikalitetet, përfshirë pyetjen të cilës baza socialiste do t’i japë përgjigje sikurse a do të ketë fushatë nga kërkuesi referendumit.
Pavarësisht se në mbledhje ishte kërkuesi i referendumit, kryeministri Rama përgjigjen e ka marrë nga Gramoz Ruçi. Një burim nga grupi socialist i tha Top-Channel se qëndrimi i Ruçit ka qenë i prerë.
“Për aq kohë sa anëtarësia është thirur të japë një mendim në referendum, PS nuk ka përse bën fushatë. Por, kush të dojë të ndërmarrë një fushatë është i lirë ta bëjë” ka thënë ai.
Ruçi përpara deputëtëve ka shpjeguar thelbin se si do të formulohet pyetja “Nëse partia fiton zgjedhjet parlamentare dhe kryetari i saj është mandatuar për kryeministër, a quhet legjitim vazhdimi i mandatit si kryetar partie?”, Po apo Jo.
Ben Blushi, ndryshe nga javët e shkuara nuk bëri asnjë koment përpara kamerave për përgjigjen e marrë nga Ruçi.
Ndërkohë, Koço Kokëdhima e ka vijuar debatin me Ruçin atje ku e la javën e kaluar. Ai ka kundërshtuar përgjigjen e kreut të grupit se çështjet e Gjykatës kushtetuese kalojnë automatikisht në për votim në kuvend. Ai i ka lexuar Ruçit procedurën, duke ngritur pretendimin se rasti i tij nuk është ai për të cilën mori përgjigje.
Më herët deputeti i Vlorës e vijoi në distancë përplasjen tashmë të hapur me Ruçin, duke mbrojtur iniciativën e ndërmarrë për organizimin e partisë në jug të Shqipërisë, sipas modelit Kokëdhima.
“Ajo reformë që kemi zhvilluar në parti është përkrahur gjerësisht nga partia dhe qytetarët e rajonit”, deklaroi Kokëdhima.
