Presidenti i Shteteve të Bashkuara, Donald Trump, ka bërë publike fejesën e djalit të tij të madh, Donald Trump Jr. me Bettina Anderson, një figurë e njohur e shoqërisë së lartë në Palm Beach. Njoftimi u bë gjatë një eventi festiv të mbajtur në Shtëpinë e Bardhë, ku presidenti ndau lajmin me të pranishmit.
Lajmi u konfirmua më vonë edhe nga një zëdhënës i çiftit, ndërsa në rrjetet sociale qarkulloi një video ku presidenti Trump shihet duke folur për fejesën. “Ata po shkojnë shumë mirë me njëri-tjetrin dhe përmes meje njoftuan se do të martohen”, deklaroi Trump, përpara se ta ftonte çiftin të bashkohej me të në skenë. Donald Trump Jr. falënderoi publikisht të fejuarën e tij për pranimin e propozimit, duke e quajtur një moment të veçantë në jetën e tij.
Bettina Anderson është e njohur në qarqet elitare të Palm Beach dhe prej disa kohësh ka qenë në qendër të vëmendjes mediatike për lidhjen e saj me djalin e presidentit amerikan. Romanca e çiftit besohet se ka nisur vitin e kaluar.
Kjo është fejesa e tretë për Donald Trump Jr. Ai ishte i martuar më parë për 12 vjet me Vanessa Trump, ish-modele dhe aktore, me të cilën ka pesë fëmijë. Çifti u nda zyrtarisht në vitin 2018. Pas divorcit, Trump Jr. u fejua me Kimberly Guilfoyle, një ish-prezantuese e Fox News, por fejesa e tyre përfundoi para se ai të fillonte lidhjen me Anderson.
Fejesa e re ka tërhequr vëmendje të madhe mediatike dhe konsiderohet një zhvillim i rëndësishëm në jetën personale të familjes Trump.
