Donald Trump është shpallur sërish “Njeriu i Vitit” i revistës Time, për herë të dytë në më pak se një dekadë.
Trump mori titullin edhe në vitin 2016, pas fitores së tij të parë në zgjedhjet presidenciale, dhe tani i bashkohet grupit të njerëzve që janë zgjedhur dy herë. Grupi përfshin tre presidentët e fundit me dy mandate: Bill Clinton, George W. Bush dhe Barack Obama. (Franklin D. Roosevelt është i vetmi person që i është dhënë titulli tre herë).
Trump ka pasur një marrëdhënie të ‘stuhishme’ me revistën Time. Pasi u emërua personi i vitit në vitin 2016, ai e përshkroi revistën si një botim “shumë të rëndësishëm” dhe tha se i kishte dhënë një “nder të jashtëzakonshëm”.
Por Trump, i cili kishte fituar një garë polarizuese presidenciale, në të cilën ai humbi votën popullore, u përplas me revistën, e cila e përshkroi atë si “president i shteteve të ndara të Amerikës”.
Për “Njeriun e Vitit 2024”, Trump ishte në garë me Zëvendës Presidenten Kamala Harris; Princeshën e Uellsit, Katerina; kryeministrin izraelit, Benjamin Netanyahu; presidenten meksikane, Claudia Sheinbaum; miliarderi Elon Musk dhe sensacionin e podcast-it Joe Rogan.
Donald Trump i tha prestigjiozes Time në një intervistë së bashku me emërimin e tij se një nga veprimet e tij të para zyrtare si president do të ishte falja e shumicës së protestuesve të akuzuar ose të dënuar për sulmin në Kapitol për të bllokuar certifikimin e fitores së Biden.
