Bruksel – PE thirrje opozitës të rikthehet në Kuvend

Pothuajse të gjithë eurodeputetët, të majtë dhe të djathtë, kanë ndarë së bashku mendimin që deputetët e opozitës duhet të lënë bojkotin e t’i drejtohen Kuvendit. Eurodeputetja Doris Pack ka deklaruar sot për mediat se PE pothuajse e ka injoruar sot situatën politike të krijuar në Shqipëri. Sipas saj në rezolutën për Strategjinë e Zgjerimit nuk përmendet fare situata politike e krijuar pas zgjedhjeve të 28 qershorit në Shqipëri. “As që përmendet fare që opozita ka bojkotuar parlamentin. Në amendament do të kërkoj që t’i bëhet thirrje opozitës për të mos qëndruar rrugëve. Duhet t’u themi dhe të pozicionohemi qartë, që opozita duhet t’i kthehet parlamentit në Shqipëri”, theksoi Pack. Të njëjtin mendim ka ndarë dhe eurodeputeti, Christian Vigenin, i cili theksoi se pavarësisht arsyeve që mund t’i ketë opozita, ajo duhet të qëndrojë në Parlament. “Nuk mendoj se opozita e një vendi që synon anëtarësimin në BE duhet të qëndrojë jashtë parlamentit. E nga ana tjetër, as ne nuk duhet t’i mbyllim sytë e të mos shohim se atje vërtet ka një problem”, tha Vigenin.