Kush tha që Presidenti i Republikës së Shqipërisë nuk është fans i muzikës rock?
Presidenti Ilir Meta, ka pozuar sot si rroker i vërtetë me këngëtarin që përfaqësoi vendin tonë në Eurovision, Eugent Bushpepa. Në një postim në rrjetet sociale ai falënderoi këngëtarin për përfaqësimin dinjitoz të Shqipërisë.
“Falenderova sot me mirënjohje, yllin e rokut dhe muzikës moderne shqiptare, Eugent Bushpepa për përfaqësimin dinjitoz të Shqipërisë në Eurovision. Me zërin e tij unik dhe falë talentit të papërsëritshëm, Genti lartësoi muzikën dhe gjuhën e mrekullueshme shqipe në skenën europiane, duke na bërë krenar të gjithëve.”- shkruan Meta.
Por, nuk mbaron me kaq…
Të njëjtën foto ka postuar dhe vetë këngëtari, krah të cilës ka shkruar: “Me Presidentin me Rock ne Bote!?? Z.PRESIDENT shume faleminderit per vleresimin dhe mikpritjen!”
Mesa duket kjo nuk është pritur mirë nga fansat e rokerit, të cilëve nuk i ka pëlqyer afrimiteti i tyre dhe kanë vërshuar me komente negative.
Megjithatë Eugenti e ka pasur një përgjigje dhe për kritikat, pasi ka komentuar: “Miq, une nuk merrem aspak me politike, eshte larg synimeve te mia, por Z.Ilir Meta mbetet Presidenti i Republikes se Shqiperise dhe vleresimi artistik mbetet vleresim pa dallime partiake, keshtu qe ju lutem qendroni larg bindjeve politike per nje moment.”
