Tiranë – Berisha zhvillon vizitë në tregun çam

Përfaqësues të biznesit të vogël në këtë treg i shprehën shqetësimin kryeministrit për rritjen e taksave vjetore nga bashkia e kryeqytetit, duke theksuar se këto taksa po rëndojnë dhe po bëjnë shumë të vështirë biznesin e tyre. Ata theksuan se në një takim të zhvilluar me kryetarin e bashkisë së Tiranës, i kishin kërkuar atij mbajtjen e premtimit për ndërtimin e këtij tregu me të gjithë elementët e nevojshëm, por prej tij kishin marrë përgjigje negative dhe arrogante. “I kërkova kryetarit të minibashkisë suaj, zotit Bogdani, të bëni bashkërisht projektin dhe ne do ta financojmë ndërtimin e këtij tregu, të cilin ju e meritoni plotësisht”, theksoi kryeministri. “4 vite më parë premtuam përgjysmimin e taksës kombëtare për këtë biznes dhe e realizuam atë, si një vendim shumë i rëndësishëm dhe i domosdoshëm” shtoi më tej Berisha. Kryeministri u ndal në çështjen e ngritjes së taksave nga bashkia e Tiranës duke theksuar se, në dhunim të të gjitha ligjeve, kjo bashki shumëfishoi taksat për biznesin e vogël nga 2 deri në 4 herë. “Por, qeveria nuk e lejoi këtë gjë dhe vendosi me ligj që nuk mund të paguhet nga biznesi i vogël asnjë qindarkë më shumë se 10% e taksës së përgjithshme. Për çdo moskorrektësi me këtë ligj, kryetari i bashkisë dhe cilido taksambledhës që do e shkelë këtë vendim, do të përgjigjet para ligjit”, u shpreh kryeministri.