Kolegji Zgjedhor shtyu për të premten shqyrtimin e kërkesës ankimore të LSI-së për qarkun e Kukësit. LSI kërkon rinumërimin e 15 kutive të votimit në këtë qark, duke pretenduar se gjatë këtij procesi ka pasur pasaktësi dhe rezultati i dalë ka ndikuar në ndarjen e mandateve. Sipas saj, PD ka marrë mandatin e katërt në këtë qark me vetëm 15 vota më shumë se kjo forcë politike. Dy ditë më parë, Kolegji Zgjedhor nisi shqyrtimin e ankesës së LSI-së, duke u shprehur për ekzaminimin e pamjeve filmike të paraqitura nga ky subjekt zgjedhor lidhur me numërimin në 15 qendra votimi në Kukës. Pas disa orësh shqyrtimi trupa gjyqësore i kërkoi palëve që të propozojnë nga një ekspert, të cilët do të marrin në dorë pamjet filmike. LSI përfaqësohet nga eksperti Ardian Pollo, ndërsa Partia Demokratike nga eksperti Zamir Hoxha.
