Policia vijon operacionin në Lazarat, deri tani 14 të ndaluar

Policia e Shtetit vijon edhe sot operacionin për kapjen e personave të shpallur në kërkim, për sulmin me armë të një ditë më parë, ku mbeti i vrarë efektivi i forcave RENEA, Ibrahim Basha dhe u plagosën dy efektivë të tjerë.

Policia e Shtetit njofton se gjatë këtyre orëve, janë ndaluar 14 shtetas.

Policia gjithashtu shton se, në orët e para të mëngjesit të sotëm, forcat speciale RENEA dhe FNSH kanë rinisur kontrollet në fshatin Lazarat dhe në banesat e personave të shpallur në kërkim.

Ndërkohë, grupi hetimor po kqyr vendin ku u sulmuan me armë forcat e Policisë. Të dhënat paraprake evidentojnë të paktën 10 vatra zjarri, ku u sekuestruan rreth 100 gëzhoja kallashnikovi dhe mitralozi, një granatë dhe një thikë.

Policia e Shtetit përsërit edhe njëherë thirrjen drejtuar personave të shpallur në kërkim, të dorëzohen pranë organeve ligjvënëse. Operacioni do të vijojë deri në kapjen e personit të fundit në kërkim dhe përballjen e tyre me forcën e ligjit.

14 shtetasit e ndaluar nga Policia:

1. Zhaklin Dërxho

2. Albon Meçi

3. Rustem Mahmutaj

4. Fatmir Gërveshi

5. Jeton Kalemi

6. Xhuljan Malo

7. Xhemil Gjolleshi

8. Gurim Skënderi

9. Denis Mahmutaj

10. Xhuljano Nuri

11. Sinan Rabaj

12. Sevo Shurdhi

13. Gerald Bime

14. Eligent Basha