Nga televizioni në politikë, Floriana Garo tregon çfarë e shtyu të bëhej pjesë e PD-së

Pas një shkëputjeje të gjatë nga televizioni, Floriana Garon do të keni mundësi ta shihni sërish në ekran. Kësaj here jo me ndonjë emision të ri, por si zëdhënësen e re të Partisë Demokratike. Ish-moderatorja e “Jo vetëm modë” është fytyra e re PD-së, madje pak ditë më parë ajo do të shprehej krenare për këtë sfidë të re në jetën e saj profesionale. Por, si erdhi ftesa dhe çfarë e shtyu të bëhej pjesë e PD-së? Floriana është rrëfyer sot për “Kjo javë” në “News 24” përballë gazetares Nisida Knezi.

Advertisement

Pjesë nga Intervista:

Si erdhi ftesa?

-Ishte një mendim i menduar prej disa kohësh, jo shumë, gjithmonë me bashkëshortin e kemi biseduar mundësinë e rikthimit në Shqipëri. Ai ka jetuar 28 vite në Zvicër, por është shqiptar dhe patriotizmin e ka pasur brenda.

Kush ua bëri ftesën?

-Ma bëri Lulzim Basha, por unë vetë kam shprehur dëshirën për të kontribuar në PD. Ka qenë një vendim i diskutuar me familjen dhe isha e gatshme të jepja kontributin tim. Misioni do të vijojë, jam kthyer me këtë qëllim. Është e rëndësishme që njeriu të provojë veten, por synimi është për të vijuar.

Duke i parë gjërat nga jashtë çfarë ka qenë zhgënjyese nga qeveria?

-Është marrë shumë me imazhin, me rregullimin e shesheve, disa rruga të vogla, e megjithatë borxhi është rritur dhe nuk janë bërë investime për të rregulluar jetën e shqiptarëve. Vjet është përfunduar një plazh i mrekullueshëm në Gjenevë, është bërë një plazh nga e para, muze, rruga nga e para, krejt falas për qytetarët dhe i gjithë ky projekt ka kushtuar 65 milionë franga. Kështu që i gjithë ky investim për kaq para. Këtu në Shqipëri bëhet 25 mln euro një kilometër rrugë. Njerëzit paguajnë për këtë gjë dhe kjo më ka bërë vërtetë të mendoj: kjo nuk është në rregull.