Një konflikt, që prej më shumë se një viti vijon të mbetet i pazgjidhur mes Neda Karafilit dhe Ogren Ballukut, është shoqëruar edhe me përplasje në ambientet e zyrave përmbarimore. Neda Balluku i është drejtuar emisionit “Fiks Fare”, duke pretenduar se prej një viti nuk arrin të takojë dy djemtë e saj të mitur, pavarësisht vendimit të gjykatës që parashikon takimet me ta.
Ajo ngre shqetësime për mënyrën se si është trajtuar çështja nga përmbarimi, ndërsa pretendon se nga ana e saj ka respektuar vendimin për takimet e babait me vajzën e vogël. Sipas Nedës, ajo e ka dërguar vajzën në banesën e të atit, por pavarësisht kësaj është gjobitur për moszbatimin e vendimit, pasi nuk është paraqitur në zyrat përmbarimore me fëmijën, duke theksuar se ka bërë këtë zgjedhje në mënyrë që fëmijët të kalojnë kohë me njëri-tjetrin në banesën e të atit.
Në mbështetje të pretendimeve të saj, emisioni ka publikuar dokumente, komunikime dhe pamje filmike nga paraqitjet e saj në zyrat përmbarimore.
Pjesë e konfliktit janë bërë edhe dy vlerësime psikologjike për fëmijët. Në raportin e parë, psikologia e caktuar nga gjykata ka evidentuar shenja të ndikimit të njërit prind në marrëdhënien e fëmijëve me tjetrin, duke ngritur shqetësime se ata mund të jenë larguar emocionalisht nga nëna. Në një vlerësim të dytë, të kërkuar nga përmbaruesja pas kërkesës së babait, nuk janë evidentuar të njëjtat probleme. Sipas “Fiks Fare”, gjykata ka sqaruar se nuk e kishte kërkuar këtë raport dhe se vendimi i përkohshëm për takimet e nënës me fëmijët duhej të zbatohej.


Ndërkohë, Neda ka kundërshtuar edhe mënyrën se si është administruar dosja e saj në përmbarim. Pas kërkesës për ndryshimin e përmbarueses, drejtuesi i zyrës kishte urdhëruar kalimin e saj te një tjetër punonjëse, por sipas dokumenteve, dosja nuk ishte dorëzuar. Më 29 tetor, Neda është gjobitur pikërisht ditën kur ishte paraqitur në zyrë për të deklaruar se kishte zbatuar vendimin. Ajo është rikthyer edhe më 12 nëntor, për të raportuar sërish se kishte dorëzuar vajzën te babai.
Nga ana tjetër, Ogren Balluku mohon pretendimet e ish-partneres së tij dhe kundërshton versionin se po pengon takimet e saj me fëmijët. Ai pretendon se nuk e ka takuar vajzën prej një muaji dhe se përfshirja e çështjes në media po ndikon negativisht te fëmijët. Gjatë komunikimit me gazetarët, Ogreni u shpreh gjithashtu se Neda ka dështuar si nënë.
Konflikti mes ish-çiftit ka nisur të bëhet publik që në vitin 2025. Në nëntor të atij viti, gjatë një interviste në emisionin “Goca dhe Gra”, Neda konfirmoi se kishte kërkuar divorcin nga Ogren Balluku, me të cilin ka tre fëmijë. Ajo tregoi se marrëdhënia mes tyre kishte qenë e vështirë prej vitesh, por shprehu dëshirën për ta menaxhuar situatën me sa më shumë privatësi, për hir të fëmijëve.
Në janar 2026, mosmarrëveshjet kaluan në gjykatë. Gjykata e Tiranës lëshoi një urdhër të menjëhershëm mbrojtjeje në favor të Nedës, ndërsa rrëzoi një kërkesë të mëvonshme të Ogrenit për të njëjtën masë. Gjatë procesit, të dy palët paraqitën pretendime ndaj njëra-tjetrës dhe Neda deklaroi se po pengohej të takonte djemtë.


