Axhenda e sotme parashikon paraqitjen fillimisht të Austrisë, për të vijuar më pas me Azerbajxhanin, Bahreinin dhe Bjellorusinë. Ndërsa Austria dhe Bahreini kanë dhënë arguente pro, Azerbajxhani e Bjellorusia kanë dalë kundër sot me fjalimet e tyre. Shqipëria e mbajti dje dëshminë e saj në Hagë, përmes të cilës ka mbrojtur pavarësinë e Kosovës dhe vullnetin politik të popullit të saj për të qenë i pavarur. Në seancën e djeshme ishte vetëm Argjentina ajo që e kundërshtoi shpalljen e pavarësisë. Përfaqësuesja e saj, e ka cilësuar deklaratën e pavarësisë në kundërshtim me Rezolutën 1244 të Këshillit të Sigurimit. “Pavarësia e Kosovës ka shkelur parimin e integritetit territorial dhe nuk është në harmoni me të drejtën e popujve për vetëvendosje”, ka thënë ajo. Nga ana e tyre, autoritetet kosovare kanë dalë dje me një deklaratë duke shtuar se dalja pro, e pritshme e Gjykatës Ndërkombëtare të Drejtësisë në Hagë mbi ligjshmërinë e pavarësisë së Kosovës, do të sigurojë më shumë njohje drejt saj në të ardhmen nga shtetet që deri tani kanë hezituar ta bëjnë një gjë të tillë.
