Sylvester Stallone ka folur hapur për një nga dhimbjet më të mëdha të jetës së tij, humbjen e të birit Sage. Në një intervistë për The New York Times, aktori 80-vjeçar ka rrëfyer momentin kur mësoi për vdekjen e tij dhe mënyrën se si e përjetoi pikëllimin në ditët që pasuan.
Sage Stallone, djali i aktorit nga martesa me Sasha Czack, vdiq në vitin 2012, në moshën 36-vjeçare, pas një ataku në zemër. Për Stallone, humbja solli edhe një ndjenjë të fortë faji dhe shumë pyetje që nuk kishin përgjigje.
“Kalon nëpër kaq shumë faza faji. Mendon: ‘Çfarë mund të kisha bërë? A duhet të kisha qenë atje? Po sikur të kisha shkuar djathtas në vend që të kisha shkuar majtas?’”, rrëfeu ai.
Stallone kujtoi edhe momentin kur mori lajmin për vdekjen e të birit. Telefonata erdhi nga bashkëshorti i ri i nënës së tij, i cili ishte mjek.
“Do të jetë gjithmonë në kujtesën time. Ishte shumë e ftohtë. Ai më telefonoi dhe më tha: ‘Sly, ai ka ikur. Sage ka ikur.’ Unë i thashë: ‘Ku ka shkuar?’ Dhe ai më tha: ‘Ai ka vdekur. Ka ikur. Më vjen keq’”, tregoi aktori.
Në ditët e para pas humbjes, Stallone u përpoq të vazhdonte me përgjegjësitë që kishte përpara. Ishte funerali, përballja me nënën e Sage dhe përpjekja për të vazhduar jetën, ndërsa ende po përpiqej të kuptonte atë që kishte ndodhur. “Një britmë që nuk e kisha dëgjuar kurrë më parë”
Stallone tregoi se shpërthimi i vërtetë emocional erdhi rreth një javë pas vdekjes së të birit.
“Me funeralin, me përpjekjen për të vazhduar me jetën, e gjithë kjo të çon në një botë krejt tjetër. Mendon: ‘Uau, mund ta përballoj. Kur do të shpërthejë?’”, tha ai.
Më pas, kur ishte vetëm në dhomën e tij, aktori përjetoi një moment që e përshkroi si të papërballueshëm.
“Një britmë doli nga unë që nuk e kisha dëgjuar kurrë më parë dhe nuk e kam dëgjuar më që atëherë. Ishte vetëm dhimbje, pikëllim dhe faj. Ishte çnjerëzore”, rrëfeu Stallone.
Duke folur për Sage, Stallone e përshkroi të birin me shumë dashuri dhe tha se ai kishte ende shumë për të dhënë.
“Ai ishte një fëmijë shumë i mirë. Ai kishte një nënë të mrekullueshme. Mund të kishte bërë shumë gjëra të mëdha në të ardhmen”, tha aktori.
Sage kishte ndjekur edhe gjurmët e të atit në kinema. Ai luajti në disa filma dhe u shfaq përkrah Sylvester Stallone në Rocky V.
Sage u gjet i vdekur në shtëpinë e tij në Los Angeles më 13 korrik 2012. Vdekja e tij në moshën 36-vjeçare mbetet një nga humbjet më të dhimbshme në jetën e Stallone, i cili edhe vite më vonë flet hapur për dhimbjen dhe fajin që shoqëruan atë periudhë.
