Këngëtari amerikan, Justin Timberlake, ka zbuluar se është diagnostikuar kohët e fundit me sëmundjen Lyme, një infeksion bakterial që transmetohet nga rriqrat dhe që ka ndikuar ndjeshëm në shëndetin e tij gjatë turit botëror ‘Forget Tomorrow’.
Në një postim në Instagram, artisti 43-vjeçar tregoi se ka qenë “duke u përballur me disa probleme shëndetësore” dhe e përshkroi sëmundjen si “dobësuese, si mendërisht ashtu edhe fizikisht”. Timberlake shpjegoi se diagnoza e ndihmoi ta kuptonte më mirë dhimbjen e fortë të nervave, lodhjen e skajshme dhe simptomat e tjera që përjetonte gjatë performancave në skenë.
Megjithëse kishte menduar të ndërpriste turin, ai shprehu gëzim që vazhdoi: “Gëzimi që më jep performanca e tejkalon ndjeshëm stresin e përkohshëm që ndiente trupi im.” Ylli i pop-it, i cili sapo përfundoi një koncert në Stamboll, pranoi se nuk e di çfarë do të sjellë e ardhmja për sa i përket skenës, por siguroi se do të vazhdojë të vlerësojë çdo moment që kalon aty.
Edhe pse zakonisht i rezervuar për jetën personale, Timberlake vendosi ta ndajë publikisht diagnozën e tij “për të shmangur keqkuptimet dhe për të ndihmuar të tjerët” që përballen me të njëjtën sëmundje.
Sëmundja Lyme mund të shkaktojë simptoma të ngjashme me gripin, marramendje, dhimbje kraharori, çrregullime të ritmit të zemrës, artrit, paralizë të nervit të fytyrës, dhimbje të vazhdueshme në kyçe, lodhje, depresion dhe probleme të tjera neurologjike, reumatologjike e kardiake. Timberlake theksoi se dëshiron të rrisë ndërgjegjësimin për këtë sëmundje dhe të nxisë më shumë ndjeshmëri dhe lidhje njerëzore mes atyre që përballen me sfida të ngjashme.
