Tiranë – Meta vlerëson kandidatët për kryetar të LSI-së

Kështu ka deklaruar gjatë një takimi me përfaqësues dhe simpatizantë të Lëvizjes Socialiste për Integrim, kryetari i kësaj force politike, Ilir Meta, sipas të cilit “të dielën e ardhshme, në datën 26 shtator, të gjithë anëtarët e LSI-së dhe LRI-së së Tiranës, do të votojnë për kryetarin e  tyre të ri përmes votës së shenjtë dhe të fshehtë”. “Janë dy intelektualë të shquar në fushat e tyre, janë dy profesorë me kontribute të spikatura shoqërore, shkencore, morale. Janë dy emrat, të cilët kanë dhënë kontribute shumë të rëndësishme për LSI. Të dy nuk janë pjesë e qeverisë, edhe pse të dyve u janë propozuar detyra shumë të larta në qeveri, por nuk i ka penguar që të jenë nga më aktivët në veprimtarinë e tyre”, i ka përshkruar ai dy kandidatët e LSI-së. Sipas Metës, LSI nuk është krijuar dhe nuk ka si motiv të saj për  të sjellë në pushtet disa individë, cilitdo qofshin ata, por është një forcë politike e cila ka ardhur për ta ndryshuar dhe modernizuar jetën politike në Shqipëri, për të sjellë standarte të reja, dhe standardet që përfaqësojnë Edmond Panariti dhe Shezai Rrokaj, janë nga më të lartat, dhe kontributet e tyre janë nga më të vyerat. Duke përfunduar se kandidatët Rrokaj dhe Panariti “janë një shembull suksesi për shumë arsye, për të gjithë ata që duan të ecin përpara në rrugën e shkencës, për të gjithë ata që duan të ecin përpara në rrugët më të mira bashkëkohore”.