Shqipëri – Kryeministri Berisha niset për të marrë pjesë në samitin e Kroacisë

Në samit marrin pjesë kryeministrat e Kroacisë Jodranka Kosor, Italisë Silvio Berluskoni, Francës Francois Fillon, i Polonisë Danald Tusk, i Sllovenisë Borut Pahor, i Bullgarisë Boyko Borisov, i Malit të Zi Milo Gjukanovic, i Bosnje Hercegovinës Nikola Spiric, i Kosovës Hashim Thaçi, si dhe përfaqësues të lartë të Bashkimit Europian dhe Parlamentit Europian. Pjesë e delegacionit shqiptar është edhe ministri i Punëve të Jashtme Ilir Meta, i cili do të marrë pjesë edhe në takimin e vendeve të Kartës së Adriatikut. Kryeministri Berisha do të jetë një nga folësit në sesionin e ditës së nesërme, ku do të trajtohet qeverisja ekonomike, bota pas krizës më të rëndë financiare dhe ecja drejt ekonomive të zhvilluara. Në fjalën e tij, ai do të përqendrohet në zhvillimet ekonomike në vend, arritjet dhe përballimi i pasojave të krizës botërore. Ndërkaq, gjatë qëndrimit në Dubrovnik, kryeministri Berisha do të ketë takime dypalëshe me homologë të tij, pjesëmarrës në samit.