Tiranë – Rama, ligji për SHISH është gabim

Kreu i PS-së, në një deklaratë për shtyp u shpreh se kryeministri Berisha po u bën karshillëk Shteteve të Bashkuara të Amerikës, duke vazhduar me miratimin e ligjit. “Kjo është një sjellje që nuk turpëron thjesht zotin Berisha, po turpëron Shqipërinë në marrëdhëniet me Shtetet e Bashkuara, sepse është kryeqeveritari i këtij vendi ai që sillet me shqetësimin e mikut dhe aleatit më i madh i shqiptarëve, njësoj si komisionerët e Ruzhdies me lirinë e votës. Nuk është hera e parë që Sali Berisha u bën karshillëk Shteteve të Bashkuara në kundërshtim me interesat e Shqipërisë e të shqiptarëve dhe, edhe këtë herë, në sfondin e karshillëkut provincial është kriza e demokracisë, e shtetit të së drejtës, e ekonomisë së vendit”, u shpreh Rama. Ai u shpreh se PS-ja ka pritur tre ditë me radhë reagimin e Berishës për deklaratën e ambasadorit Uithers. “Prej tre ditësh kryeministri i këtij vendi, që pa miqësinë e partneritetin e Shteteve të Bashkuara jo vetëm nuk do të ishte sot në NATO, po as do të kishte garancitë që ka sot për sigurinë e për ardhmërinë e vet, jo vetëm nuk ka reaguar ndaj shqetësimit publik të përfaqësuesit të nderuar të Shteteve të Bashkuara, po është mjaftuar me nxjerrjen e një zëdhënëseje, e cila recitoi se projektligji qenkërka pikë për pikë sipas standardeve të NATO-s e të BE-së”, u shpreh Rama.