Përmes zëdhënësit Ralf Gjoni, MPJ përshëndet miratimin nga ana e Këshillit të Ministrave të Brendshëm të BE të propozimit të Komisionit për heqjen e vizave Schengen me Maqedoninë, Malin e Zi dhe Serbinë. “Sigurisht që ky është një sinjal shumë pozitiv për të gjithë Ballkanin Perëndimor si dhe për objektivat tona të përbashkëta integruese në BE”, tha Gjoni. Ai shtoi se “kam besim se shumë shpejt, do të kemi një Propozim nga Komisioni për Shqipërinë, duke patur parasysh se ecuria e përmbushjes së kritereve nga ana jonë është optimale”. Le të mos harrojmë, vijoi Gjoni, pikënisjen e Shqipërisë në raport me fqinjët e saj të ish-Jugosllavisë, dhe të shohim qartë progresin konkret që është bërë në vendin tonë përgjatë viteve. Ndërsa duke përfunduar, Gjoni siguroi se “ne po punojmë fort si brenda, ashtu edhe jashtë vendit që brenda vitit 2010 t’u mundësojmë qytetarëve shqiptarë lëvizjen pa viza në hapësirën Schengen”.
