“Brenda kohës së mbetur nga sesioni parlamentar, çdo deputet të ketë komunikim në çdo zonë të vendit, me strukturat, përfaqësuesit nga çdo qendër votimi për të folur e dëgjuar. Aleati ynë është zëri i të ardhmes, fara e shpresë që duhet ta mbjellim në çdo shtëpi shqiptare, zemra e popullit opozitar që duhet ta bëjmë të rrahë fort përmes trokitjes sonë për një Rilindje shqiptare. Duhet të bëjmë që asgjë të mos duket e pamundur për çdo shqiptar që do ndryshimin. Ky është një mision patriotik, të cilin do e nisim nga vetja, duke rrezatuar besnikëri e solidaritet”, tha Rama në mbledhjen e sotme të grupit parlamentar socialist. Ai theksoi se PS për të fituar zgjedhjet vitin e ardhshëm ka vetëm fuqinë njerëzore që duhet të mblidhet, fitohet e bashkohet. Kryetari i PS-së akuzoi qeverinë se ka nisur një fushatë shpifjesh dhe përbaltjesh për opozitën. “Motoja e sotme e qeverisë është se fajin e ka opozita që shqiptarët nuk kanë punë, nuk kanë fuqi blerëse e nuk kanë shtet. Sot në vigjiljen dramatike të humbjes së statusit kandidat në BE fajin sërish e ka opozita. Kjo rapsodi e vrazhdë që këndohet në çdo skenë përçohet përmes zërave të dëshpëruar që tek opozita e gjejnë fajin për gjithçka. Kundërshtari im ka një strategji të lexueshme, nuk ka mundësi të tregojë duart e pastra, duart e tyre janë të zhytura në korrupsion dhe këtë e tregojnë raportet e ndërkombëtareve”, shtoi Rama. Gjithashtu, kreu i PS-së, iu referua sërish Lotarisë Kombëtare, duke kërkuar edhe dorëheqjen e ministrit të Financave, Ridvan Bode. “Lotaria Kombëtare është një padrejtësi e madhe, me qëllim kthimin në një mekanizëm për të rritur fitimet e kryeministrit dhe ministrit të Financave, i cili është një spekulator që duhet të japë dorëheqjen. Lotaria Kombëtare është shembulli më i pastër i korrupsionit, është pabesi ndaj qytetarëve”, theksoi Rama.
